'ചാംപ്യൻസ് ട്രോഫി ഇന്ത്യൻ ടീമിലെത്തുന്നത് ചിന്തിച്ചിട്ട് പോലുമുണ്ടായിരുന്നില്ല': കരുൺ നായർ

വിജയ് ഹസാരെ ട്രോഫിയിലെ മികച്ച പ്രകടനത്തിനിടെയിലും ഇന്ത്യൻ ടീമിൽ ഇടം ലഭിക്കാത്തതിൽ പ്രതികരണവുമായി വിദർഭ താരം കരുൺ നായർ. ചാംപ്യൻസ് ട്രോഫിക്കുള്ള ഇന്ത്യൻ ടീമിൽ ഇടം ലഭിക്കുന്ന കാര്യം ചിന്തിച്ചിട്ടുപോലുമില്ലെന്നാണ് കരുണിന്റെ വാക്കുകൾ. ടെസ്റ്റ് ക്രിക്കറ്റിൽ ഇന്ത്യയ്ക്കായി കളിക്കുകയെന്നതാണ് തന്റെ മനസിലുള്ള ഏക ലക്ഷ്യം. കരുൺ സ്പോർട്സ് ടുഡെയോട് പ്രതികരിച്ചു.

ഇന്ത്യൻ ടീമെന്ന ലക്ഷ്യം ഇപ്പോഴും തനിക്ക് ഒരുപാട് ദൂരെയാണ്. എങ്കിലും തനിക്ക് ഇപ്പോഴും സ്വപ്നങ്ങളുണ്ട്. അവ സ്വന്തമാക്കാനുള്ള ശ്രമം തുടരും. എന്നാൽ അത് എപ്പോൾ സംഭവിക്കുമെന്നത് ഇപ്പോഴും തന്റെ മനസിൽ ഒരു ചോദ്യചിഹ്നം മാത്രമാണെന്നും കരുൺ നായർ വ്യക്തമാക്കി.

വിജയ് ഹസാരെ ട്രോഫി സീസണിൽ എട്ട് ഇന്നിം​ഗ്സുകളിൽ നിന്നായി 779 റൺസാണ് വിദർഭ നായകൻ കൂടിയായ കരുൺ അടിച്ചുകൂട്ടിയത്. അഞ്ച് സെ‍ഞ്ച്വറിയും ഇതിൽ ഉൾപ്പെടുന്നു. ടൂർണമെന്റിൽ രണ്ട് തവണ മാത്രമാണ് കരുണിനെ പുറത്താക്കാൻ എതിരാളികൾക്ക് സാധിച്ചത്. മികച്ച പ്രകടനം നടത്തിയിട്ടും ചാംപ്യൻസ് ട്രോഫിക്കും ഇം​ഗ്ലണ്ടിനെതിരായ ഏകദിന പരമ്പരയ്ക്കുമുള്ള ഇന്ത്യൻ ടീമിലേക്കെത്താൻ കരുണിന് സാധിച്ചില്ല.

ചാംപ്യൻസ് ട്രോഫിക്കും ഇം​ഗ്ലണ്ടിനെതിരായ ഏകദിന പരമ്പരയ്ക്കുമുള്ള ഇന്ത്യൻ ടീം: രോഹിത് ശർമ (ക്യാപ്റ്റൻ), ശുഭ്മൻ ​ഗിൽ (വൈസ് ക്യാപ്റ്റൻ), യശസ്വി ജയ്സ്വാൾ, വിരാട് കോഹ്‍‍ലി, ശ്രേയസ് അയ്യർ, റിഷഭ് പന്ത് (വിക്കറ്റ് കീപ്പർ), കെ എൽ രാഹുൽ (വിക്കറ്റ് കീപ്പർ), ഹാർദിക് പാണ്ഡ‍്യ, അക്സർ പട്ടേൽ, രവീന്ദ്ര ജഡേജ, വാഷിങ്ടൺ സുന്ദർ, കുൽദീപ് യാദവ്, ജസ്പ്രീത് ബുംമ്ര, മുഹമ്മദ് ഷമി, അർഷ്ദീപ് സിങ്.

Content Highlights: Karun Nair makes honest Team India admission